ست الودع كن يتجاذبن الحديث عن الحرب واثارها وكل واحدة تحكي ما واجهته من موت والم ويأس …اغلب القصص تختلف في التفاصيل والبشاعة وطريقة تنفيذها كشياطين …والغريبة كل واحدة تجتهد أن تبين أنها الأكثر ألما وضررا من جرائم الدعم السريع ..باضافة القليل من المواقف القاسيه واكشنات من الافلام الامريكيه وتستعين بالمؤثرات الصوتيه ..كانت جلستهم تحت شجرة في معسكر للايواء..فجأة تغيرت القصص واللهجه والصوت ..تذكروا أنهم نساء وهي الحقيقه الوحيدة الباقيه ..بدأن بالتباهي بأنهن كن جميلات الحي والاكثر اناقه والمحسودات من الكل ..سالت احداهن عن خالتو فاطمه ..مشو خيمتها وهي عبارة عن مشمعين مربطاهم مع بعض وهي وحيدة اخواتها في ولايه أخري وغير متزوجه فرت من الموت مع الجماعه ووصلت لمركز الايواء ولا تعلم كيف ولماذا هي موجودة معهم ..تجمعهم الحرب فجمعتهم انسانيتهم واحتووها .. وجدنها ترمي الودع لسيدة ..ارتبكت وخرجت …جلسن وسألنها بترمي الودع ؟ أجابت انا عندي الجماعة..وداعيه معروفه في بلدي ..اقعدو .. هزت الودع وبسطته علي الارض قالت اممم انتي مالك شايله همه ..المسافر ؟ ابتسمت مني وقالت طبعا لانو بعيد ..قالت ليها هو ود السرة ..ردت بنعم ..وحزن..كشكشت و رمته والتفتت لالهام وبيدها أشارت كما تقول ابعد ابعد ..قالت لبها الزولة القصيرة دي مالها معاك ؟ ..نظرت لزينب بطريقه معينه …وقالت الشر برة وبعيد ..بتغير مني لما يوزعو لينا المساعدات بشيل اكتر منها ما بقصد لكن رزقي قوي …رمت مرة تانيه وقالت لزينب ح تسافري قريب وطريقك طويل ..رفعت يدها وقالت يا رب ..فعلا طويل من هنا لكسلا تاني عطبره ..دنقلا ..مصر ..هزت ورمت و..قالت لمني ..انتي قلبك ابيض ..حلالة مشاكل شايفه ديل البنات متلمات جنبك ووصعت يدها علي ودعات مرادفات ..بس الزوله دي قريبه منك لكن قلبها اسود ..قالت والله عارفاها …المشمع البوزعوه لينا تشيل الكبيرة والتقيله لاولادها مع انهم اولاد اخوي …واحدة حاقدة ..كشكشته ورمت …دا منو الطويل الاصفر دا ؟ محمدنا كلنا ؟ عاينوا لبعض وسالوها لابس مدني ولا كاكي ؟ ولا كدمول …قالت بعد تمعن في الودع ..يعني نص نص ..وقالوا نبرأ ونستبرأ وضحكوا ..اعتذرو ليها ما عندنا حق البياض قالت بالنيه ..الحال من بعضه …اقرش حلقوهم خلو لينا حاجه ..قالت الهام ..كدي شوفي الخواجه جاي؟ وشايل شنو ؟…دواء ولا اكل ولا خيم ..وفرت منها دمعه ..كشكشته مدة طويله وقالت ليها نسأل اولاد ماما يبيض نيتهم …شايفاهم .
